Search

You may also like

Spoilers! Einfach driwwer schwätze geet net!
Neiegkeeten

Spoilers! Einfach driwwer schwätze geet net!

Dës läscht souz ech zesumme mat Kollegen op enger Terrasse.

Fondation EME: Musek schenken – online
Neiegkeeten

Fondation EME: Musek schenken – online

Trotz engem relativ turbulente Joer huet d’Fondation EME decidéiert säi

D‘Welt a seng humanitär Krisen
Neiegkeeten

D‘Welt a seng humanitär Krisen

Bezitt ee sech just op d‘Ausso vun de Vereenten Natiounen,

Chamber stëmmt mat grousser Majoritéit éischt Klimaschutzgesetz vu Lëtzebuerg

Chamber stëmmt mat grousser Majoritéit éischt Klimaschutzgesetz vu Lëtzebuerg

Pünktlech zum 5. Gebuertsdag vum Paräisser Klimaschutzofkommes den 12.12.2020, huet Lëtzebuerg fir d’éischt Kéier e nationaalt Klimagesetz opweises. Den entspriechende Gesetzestext ass den 8. Dezember 2020 vun der Ministesch fir Ëmwelt, Klima an nohalteg Entwécklung am héijen Haus presentéiert ginn, an no laangen Debatten mat 54 Jo-Stëmmen a just 4 Nee-Stëmmen bei zwou Enthalungen ugeholl ginn.

De Vott vun dësem Gesetz steet net nëmmen am Zesummenhang mam Paräisser Accord, deem seng Klima-Ambitiounszyklen et iwwerhëlt, mee e fält och an eng entscheedend Woch fir de Klimaschutz a ganz Europa. En Donneschden entscheeden déi europäesch Staats- a Regierungschefen iwwert méi héich Ambitiounen vun Europa, an debattéieren d’Mindestzil vu 55% Emissiounsreduktiounen, zu deem Lëtzebuerg elo och ganz offiziell iwwert säi nationaalt Klimagesetz e wichtegen Bäitrag leescht.

Zilsetzung 2030 an 2050

Effikasse Klimaschutz erfuerdert Planungs- an Investitiounssécherheet duerch kloer an ambitiéis Ziler: d‘Reduktioun vun den Zäregasemissiounen vun 55% am Joer 2030 par rapport zu 2005 an d‘Klimaneutralitéit spéitstens am Joer 2050 sinn am Gesetz verankert, genee wéi dat iwwergeuerdent Bestriewen fir d’Äerderwiermung op 1,5°C ze begrenzen.

Sektoriell Ziler an de Beräicher Industrie an Energieproduktioun, Mobilitéit, Gebaier, Land- a Forstwirtschaft, Offall an Ofwaasser wäerte sécherstellen, datt déi grouss Potenzialer effizient genotzt ginn. Konkret Moossnamepisten an alle Beräicher sinn am integréierten Energie- a Klimaplang, deen d’Regierung am Mee 2020 adoptéiert huet, hannerluecht.

Zesummenaarbecht a Gouvernance

Effikasse Klimaschutz bedeit eng Zesummenaarbecht vun eis alleguer: Dat neit Kadergesetz schaaft dofir déi néideg Strukturen a Prozeduren. Iwwer déi nei „plateforme climat“ wäerten all d’parties prenantes – Vertrieder vun den ëffentlechen Acteuren, der Zivilgesellschaft, den Entreprisen, den Investisseuren – un der Ausaarbechtung an dem Suivi vun der Ëmsetzung vum Energie- a Klimaplang bedeelegt ginn.

Een nei gegrënnten, onofhängegen „Observatoire“ wäert d’Ëmsetzung vun der Klimapolitik wëssenschaftlech begleeden an d’Regierung entspriechend beroden.

Nei Finanzéierungsméiglechkeeten

Méi Klimaschutz bedeit och zousätzlech Investitiounen a finanziell Ënnerstëtzung. De Klima- an Energiefong gëtt, als zentraalt Finanzéierungsinstrument vun der Klimapolitik, weider gestäerkt. Alimentéiert duerch ënnert anerem een Deel vun der neier CO2-Steier, wäert dëse Fong an Zukunft eng grouss Bandbreet vu Moossnamen an de Beräicher Klimaschutz, erneierbar Energien, Energieeffizienz an de nohaltegen Finanzen finanzéieren kënnen, net nëmmen zu Lëtzebuerg, mee och an den Entwécklungslänner.

D’Solidaritéit mat den oft am meeschten vun den Auswierkungen vum Klimawandel betraffenen Länner ass e weideren wesentlechen Bestanddeel vum Paräisser Klimaschutzofkommes.

189 vun 197 Vertragsparteien hunn de Paräisser Accord mëttlerweil ratifizéiert, a si prett fir en ab dem 1. Januar 2021 ëmzesetzen. Lëtzebuerg ass och prett.

Matgedeelt vum Ministère fir Klima, Ëmwelt an nohalteg Entwécklung

Related topics Äerderwiermung, Berodung, Chamber, CO2-Steier, Ëmweltministère, Energieproduktioun, Klimaschutz, nationaalt Klimagesetz, Paräisser Klimaofkommes
Next post Previous post