E staarkt Benevolat am Naturschutz – Chantier Nature

Beim ABC vun der Natur sprange mir haut op de Buschtaf C, wéi Chantier Nature. Mir nennen et elo Naturschantjen. Zesumme mat lokale Sektiounen organiséiert natur&ëmwelt scho säit Joren Evenementer, bei deene sech motivéiert an interesséiert Mënschen aktiv fir d’Natur an den Erhalt vun der Biodiversitéit asetze kënnen.

Dir wëllt eppes fir d’Natur maachen? Hecken a Beem planzen, Dréchewues méien, Fiichtgebidder erhalen, Weede beschneiden – gläichzäiteg awer och eng flott Erfarung an engem Naturschutzgebitt erliewen? Dann ass den Naturschantjen genee dat Richtegt fir Iech!

Onofhängeg vu Kraaft, Alter, Sprooch oder (Vir-)Wëssen ka jiddwereen deelhuelen. D’Material gëtt vun natur&ëmwelt zur Verfügung gestallt. All Rendezvousen a weider Informatiounen zum Naturschantjen an der Umeldung fannt Dir op www.naturemwelt.lu.

Zum Video-Projet

„E staarkt Benevolat am Naturschutz“ ass ee vum Ministère fir Ëmwelt, Klima an nohalteg Entwécklung ko-finanzéierte Video-Projet. An dësem Kader gi 15 kuerz Filmer produzéiert, déi ee Mix aus Videoopnamen, Grafikinfoen a Comics bidden. Dobäi ginn, wéi an engem Lexikon, verschidden Themen opgegraff an op d’Wichtegkeet vum Benevolat higewisen.

Den éischte Video am Kader vun dësem Projet ass zum Thema Regulus Club. Weider Informatioune fannt Dir HEI.