Demissioun aus private Grënn: De Pierre Gramegna verléisst d’Regierung

Nodeems d’Ministeren Dan Kersch a Romain Schneider ugekënnegt hunn vun hirem Amt ofzetrieden, wäert och de Finanzminister Pierre Gramegna demissionéieren. D’DP deelt mat, datt dëst aus perséinleche Grënn de Fall ass.

An dësem Kader seet déi demokratesch Partei „dem Pierre Gramegna Merci fir säin Engagement am Interessi vum Land wärend all dëse Joren“.

Eng éischte Kéier ass de Pierre Gramegna der Regierung de 4. Dezember 2013 bäigetrueden a gouf am Uschloss un d’Parlamentswalen 2018 nach emol vun der DP, LSAP an déi gréng zum Finanzminister ernannt.

Zum engen huet hien ëmfaassend Reformen zum Haushaltsausgläich an zur Upassung vun de Lëtzebuerger Steiervirschrëften un international Transparenzstandards initiéiert, zum aneren soll et de Finanzminister gewiescht sinn, deen als Éischte mat der Iddi zum gratis ëffentlechen Transport komm ass.

Elo ass et un der DP, fir esou schnell wéi méiglech den Nofollger vum Pierre Gramegna ze sichen.

Latest news
Related news