Search

You may also like

USA: 10 Jugendlecher bei Schéisserei am Ladd-Peebles Stadion blesséiert
Business Neiegkeeten

USA: 10 Jugendlecher bei Schéisserei am Ladd-Peebles Stadion blesséiert

No engem „Football“ Spill am Ladd-Peebles Stadion zu Mobile (US-Bundesstaat

Ass d‘Reform vun den Autorerechter an der EU duerch?
Business Neiegkeeten

Ass d‘Reform vun den Autorerechter an der EU duerch?

Mir haten déi lescht Woch op de méigleche Kompromëss bei

Nostalgie a Rubik’s Cube, fënnef Saachen déi een iwwert Ungarn wësse soll
Business Neiegkeeten

Nostalgie a Rubik’s Cube, fënnef Saachen déi een iwwert Ungarn wësse soll

An Ungarn gëtt um haidege Sonndeg e neit Parlament gewielt.

Den Aarbechtsmaart an d‘Lëtzebuerger Sprooch

Fir gutt en Drëttel vun den Aarbechtsplazen déi am Land ugebuede ginn, ass lëtzebuergesch als Sprooch grondsätzlech virgeschriwwen

Den Aarbechtsmaart an d‘Lëtzebuerger Sprooch

Zu Lëtzebuerg, wou dat Online-Wierderbuch LOD esou wéineg léift kritt datt et scho bal Onnëtz ass, et en Zentrum Lëtzebuerger Sprooch (ZLS) huet, dat mat vill guddem Wëllen eenzeg als „Alibi-Aktivitéit“ ze bewäerten ass, an engem Kommissär fir Lëtzebuerger Sprooch, bei deem sech dierf gefrot ginn, op ausser d‘Pai ophiewen, och nach aner Aktivitéite stattfannen.

Zudeem fält op, datt ëmmer méi Institutiounen zu Lëtzebuerg, nodeems se eng gefillten Éiwegkeet a franséischer Sprooch bezeechent goufen, elo englesch Bezeechnunge kréien. Englesch wäert wuel och zäitno zur véierter administrativer Sprooch avancéieren. Et huet kaum Verträg, nëmme wéineg Literatur a Kultur an der Landessprooch, an an der Schoul huet et och ganz aner Problemer.

Dat gewosst a virausgesat, kann ee sech der parlamentarescher Fro vum ADR-Deputéierte Fred Keup (4595) zouwennen. Aus dëser Fro geet ervir, datt sech den Deputéierte besuergt weist, dat well et anscheinend op der ADEM Elementer hätt, déi friemlänneschen Demandeuren elo géifen erklären, datt si fir hir Aarbecht ze maachen, déi Lëtzebuerger Sprooch net misste léieren.

Ob et elo soll zu esou Aussoe wéi: „verlueren Zäit“, „onnéideg“ an/oder „iwwerflësseg“ géintiwwer Persoune komm ass, déi eis Sprooch léiere wéilten, léisst sech nëmme bedéngt behaapten, woubäi et ass hei rieds vun der ADEM, an dat mat deem lëtzebuergeschem ass do net wierklech eng Prioritéit. Dat ass et jo och net fir hir Partner, d‘Zäitaarbechtsfirmaen a sonsteg Séileverkeefer.

Ass déi lëtzebuergesch Sprooch Folklor?

Den ADR-Deputéierten huet a senger Fro 4580 un d‘Gesondheetsministesch schonn opgeworf, dat si wuel als Äntwert op seng Fro 4008 ënnert anerem geschriwwen huet: „Fir all d’Beruffer aus dem Gesondheetssecteur déi ënnert d’Kompetenz vum Gesondheetsministere falen, gesinn déi jeeweileg Gesetzer vir, dass déi Concernéiert Lëtzebuergesch verstoe mussen“. Firwat gëtt dat net agehalen?

Generell hu mir jo vill Gesetzer, déi oft a gären als Äntwer op parlamentaresch Froe genotzt ginn. Dat gëtt et tatsächlech och fir de Logement, wou ee kéint, wann een da wéilt, Leerstand besteieren. Mee et ginn net all Gesetzer ugewannt, besonnesch dann net, wa se sech wirtschaftleche Prämissen ze béien hunn. A jo et huet dann och vill perséinlech an frëndschaftlech baséiert Hannergrënn.

Wat elo d‘ADEM betrëfft, esou gëtt et Erfarungswäerter an Demandeuren déi woen de Parcours op lëtzebuergesch duerchzezéien, déi kréie ganz séier spieren, wat een esou als Beamten u Muecht huet a wéi séier ee sech där Sprooch unhëlt, déi engem de Placeur „noleet“, da ka jee no Secteur och portugisesch sinn. De Rot lëtzebuergesch ze léieren, gëtt et streng geholl just theoretesch…

Et kann nees just relativiséiert ginn

Gutt et wier elo einfach de Fred Keup als Populist ze verklären – och wa gewëssen Iddien an och Aussoen dat duerchaus rechtfäerdegen – géif dem eigentleche Kontext an der jo awer duerchaus berechtegter Frostellung, besonnesch an de sougenannten essentielle Secteure, net gerecht. Fir den Aarbechtsminister Dan Kersch (LSAP) bestëmmt och a gewësser Mooss eng provokativ Situatioun.

A senger Äntwert konterkaréiert de Minister dem Deputéierten seng Ausso a stellt emol aleedend fest: „D‘Ausso vum honorabelen Deputéierten ass esou net richteg. Eng vun den Haaptmissioune vun der ADEM ass et de Leit ze hëllefen déi Kompetenzen ze kréien déi um Lëtzebuerger Aarbechtsmaart gefrot ginn“. An dozou géif déi Lëtzebuerger Sprooch folgerichteg och gehéieren.

Et gëtt jo am franséischen Dokument vun der Deklaratioun zur Annonce vun enger oppener Plaz, ganz däitlech gefrot, wéi eng Sprooche fir deen erwäänte Poste gefrot/gefuerdert sinn. Laut dem Minister wier dës Ufuerderung a 35% vun de bei der ADEM agereechten Offeren enthalen. Dat ass esou, reng op de Prozentsaz bezunn, absolutt richteg huet allerdéngs ee krasse Schéinheetsfeeler.

Zum enge gi vill Entreprise beim Depot vun der Offer generell déi dräi zu Lëtzebuerg ugewannten administrativ Sproochen, plus englesch, an de Formulairen un. Et huet zudeem am Land keng 35% Entreprisen an deene Lëtzebuergesch – am beruffleche Kontext – géif benotzt ginn. Anescht gesot, et huet eng Sproochenhierarchie, déi jee no Secteur a Branche duerchaus als variabel ze gesinn ass.

Jo net emol de STATEC ka lëtzebuergesch, dee confirméiert (Mee 2019) datt franséisch eigentlech d‘Verkéierssproch ass a behaapt, datt lëtzebuergesch elo déi meeschten doheem geschwate Sprooch wier. Dat ass leider Brach a geet sech net emol demographesch op. An dräi Joer huet d‘ADEM am Ganzen 7.000 Bonge fir ee Sproochecours ausgestallt. Wie rechne kann, huet analytesch e Virdeel.

Illustratioun: © Philippe Bout / unsplash

Related topics ADEM, adr, Fred Keup, Gesondheetssecteur, Lëtzebuergesch, parlamentaresch Fro 4008, parlamentaresch Fro 4580, parlamentaresch Fro 4595, Sprooch
Next post Previous post