Et gëtt mockeleg – Passt op Iech, Är Matmënschen an Hausdéieren op!

Am Laf vun der Woch wäert de Summer nees beweisen, wat an ëm stécht. Ab muer klammen d’Temperature konstant an erreechen e Samschdeg hire Spëtzewäert mat bis zu 37 °C. Ënnert dëse Konditioune sief drun erënnert, datt de Kierper vill Flëssegkeet braucht, ee genuch Zäit am Schiet verbréngen an déi staark Mëttegsonn vermeide soll.

Schonn um fréie Moien huet Météo Boulaide fir haut Maximaltemperature vun 21 bis 26 °C, mat schwaachem Wand aus dem Nordwesten ugekënnegt. Mat Reen kann een déi nächst Zäit net rechnen: Et bleift sonneg an dréchen, woubäi muer bis zu 30 °C, en Donneschdeg, bis zu 33 °C an e Freideg bis zu 36°C waarm kënne ginn.

Besonnesch um Weekend gëtt et dann esou richteg mockeleg, wann net souguer ellen hëtzeg. E Samschdeg wäert den Thermometer tëscht 33 an 37 °C uweisen, ähnlech gesäit de Sonndeg aus. Och Nuets falen d’Wäerter net wierklech ënnert 20 °C. Ma, domat soll et souguer méi waarm, wéi zu Lissabon, Malaga oder Tunis ginn.

© Lubomirkin / Unsplash

Fir d’Wuelergoe vun eis all

Wéi ee sech bei dësen Aussiichten verhale sollt, misst eigentlech jiddwerengem bekannt sinn. De Gesondheetsministère erënnert trotzdeem un déi 5 Haaptpunkten, déi eis de Summer verséissen:

• Vill drénken: 1,5 L sinn den absolute Minimum. Bei héijen Temperature verléiert de Kierper nämlech vill Waasser a Mineralsalzer.
• Gënnt Iech Schiet: Besonnesch wärend de wäermsten Dageszäite gëtt geroden, och emol Zäit am Schiet, respektiv u frësche Plazen ze verbréngen.
• Vermeit intensiv physesch Aktivitéiten: Sport an der praller Sonn a bei héijen Temperaturen suergt éischter fir gesondheetlech Problemer, wéi datt et zur Fitness bäidréit. Verleet dës Aktivitéiten op méi kill Dageszäiten.
• Erfrëschung fir de Kierper: Waasser iwwert d’Glidder lafen ze loossen, ka fir eng Erfrëschung suergen. Denkt allerdéngs drun, net onnëtz Waasser ze verschwenden!
• Passt op Är Matbierger op: Besonnesch Bëbeeën, eeler a krank Persounen si bei dësen Temperaturen op Iech ugewisen. Kuckt op et hinne gutt geet a suergt dofir, datt si genuch drénken.

Bei extremem Waasserverloscht, der Perte vu Mineralien an immenser Sonnenastrahlung sinn éischt Warnzeechen Krämp un Ärem, Been an am Bauch. Wien net handelt leit uschléissend un Dusel, Schwächt, Kappwéi oder fält souguer Schwaach. An dësem Fall gëllt et direkt an de Schiet ze goen, Waasser ze drénken an ze raschten. Am Eeschtfall soll en Dokter geruff ginn.

An dësem Kader weise mir och nach emol op d’Campagne „Entscheet dech richteg“ vun der Fondation Cancer hin, déi op de richtege Schutz virun der Sonn opmierksam mécht. Denkt och drun, fir d’Wuelergoe vun Ären Hausdéieren ze suergen, si net eleng am Auto zeréckzeloossen, net um gliddegen Ënnergrond spadséieren ze goen an hinne genuch Waasser zur Verfügung ze stellen!

Opmaacherbild: © Josh Rakower