Fondation EME: Musek schenken – online

Trotz engem relativ turbulente Joer huet d’Fondation EME decidéiert säi Projet „Musek schenken“ an eng nei Editioun ze schécken, wann och an enger bëssen anerer Manéier. Wärend Concerten an Optrëtter a senger eigentlecher Form aktuell net méiglech sinn, wëll d’Fondatioun iwwert de virtuelle Wee musikalesch Momenter un eeler, krank an/oder isoléiert Persoune schécken.

Heivir geet een Appell un Iech eraus: Deelt der Fondatioun EME d’Liiblingslidder vun der isoléierter an/oder kranker Persoun mat, déi Dir am léifsten hutt an aktuell leider net besicht ka ginn. Vergiesst dobäi net unzeginn, wisou déi jeeweileg Persoun dës originell musikalesch Offer op all Fall verdéngt huet.

Hei den Detail zu den einfachen dräi Schrëtt:

1. Mëllt Iech bei der Fondation EME iwwert contact@fondation-eme.lu an erkläert wisou den eeleren, kranken oder isoléierte Familljemember ee personaliséierte Concert verdéngt huet;
2. Schéckt 2 bis 3 Lidder, esou wéi e perséinleche Message eran. Déi professionell Museker huelen déi gewielte Lidder ob a këmmere sech ëm d’Zesummesetzung;
3. Mëtt Dezember kritt Dir d’Opname vun 1 bis 2 Lidder mam Message a kënnt en fir d’Feierdeeg mat Äre Léifsten genéissen.

Weider Informatiounen an d’Konditioune ginn et och op www.fondation-eme.lu.

Schonn am Abrëll huet d’Fondation EME seng Concerten géint d’Eleng-Sinn organiséiert an domatt en immense Succès erlieft.