Search

You may also like

De Label „EureWelcome“ fir 18 engagéiert Acteuren
Neiegkeeten

De Label „EureWelcome“ fir 18 engagéiert Acteuren

Haut de Moien huet den Tourismusminister Lex Delles 18 Plaquettë

money
ULC kritiséiert déi drastesch Erhéijung vun de Fraise vun der Raiffeisekees
Neiegkeeten

ULC kritiséiert déi drastesch Erhéijung vun de Fraise vun der Raiffeisekees

Nom Vergläich vum ULC huet d’Raiffeisekees Fraisen op Iwwerweisungen drastesch

London: Theresa May wëll kee Kompromëss beim Brexit
Neiegkeeten

London: Theresa May wëll kee Kompromëss beim Brexit

Um Sonndeg huet déi britesch Premierministesch Theresa May versprach, hire

Mat enger grenziwwerschreidender Strategie d’Groussregioun stäerken

Mat enger grenziwwerschreidender Strategie d’Groussregioun stäerken

D’Groussregioun verfollegt riseg Ziler. Zousätzlech zur Widderstandsfäegkeet an der Kompetitivitéit, sou wéi der gesteigerter Liewensqualitéit an dem Wuelstand vun der Bevëlkerung, geet et ëm eng ekologesch Gestioun vun de Ressourcen. An dësem Kader huet gëschter déi 7. sektoriell Reunioun zur Landesplanung an der Groussregioun stattfonnt.

Och an dësem Beräich ass een net ëm d’Thema vun der sanitärer Kris ronderëm komm. Bei der digitaler Konferenz vum Minister Claude Turmes a sengen Homologen gouf drop higewisen, datt d’Landesplanung e wichtegt Element wier, fir aus der sanitärer Kris eraus ze kommen a géint ekologesch Kris unzekämpfen.

An dësem Kader hunn d’Participanten op zwee essentiell Dokumenter higewisen. Zum engen ass do „Eng grenziwwerschreidend Zukunftsvisioun fir d’Groussregioun“, dat validéiert a vum Sommet vun der Groussregioun ugeholl ginn ass. Zum aneren hu mir „Eng grenziwwerschreidend operativ Strategie fir d’Groussregioun“, dat wärend 12 Méint finaliséiert a bei der Reunioun gëschter ugeholl ginn ass.

Mat dësen 2 Dossieren sinn d’Ziler festgehalen, déi d’Groussregioun bis 2040 wëll ëmgesat hunn. Dobäi bezitt ee sech op folgend 4 Haaptachsen:

  • D’Transitioun virgräifen, begleeden an orientéieren, fir esou zu enger besserer Gestioun vun de Ressource bäizedroen;
  • D’Servicer verbesseren an eng ausgeglachen Implantatioun vun Aktivitéiten, vun deenen d’Bevëlkerung profitéiert, fërderen;
  • Eng dekarboniséiert a resilient Entwécklung vu ländlechen an urbane Géigenden ënnerstëtzen;
  • Zesumme Projeten a Strukture virubréngen, an dat zesumme mat de Bierger.

Iddie vun ausserhalb si wëllkomm

Um 8. Abrëll 2020 gouf en Appell gemaach, fir Projeten eranzeschécken, déi der Groussregioun ze Gutts kommen. Am Ganze sinn dobäi 35 Iddien ukomm, déi am strategeschen Dokument opgegraff goufen. Déi nächst Etapp besteet doran, datt e Grupp un Experten dës Iddien analyséiert a kuckt, wat dovunner villverspriechend ass. Hiert Ënnersichung wäert allerdéngs keng definitiv Lëscht duerstellen, wat am Endeffekt ëmgesat gëtt.

Fir de Minister Turmes droen d’Projeten dozou bäi, fir Iddien zu enger méi ekonomescher Gestioun vun de Ressourcen (Kreeslafwirtschaft, Waasserwirtschaft,…) ze sammelen. Vir hien soll op alle Fall de Beräich Energie an Transport emissiounsfräi gestalt ginn, wouduerch hien säi Päerd op d’elektresch Mobilitéit setzt.

Groussregioun© MEA, DATer

Kooperatiounen iwwert d’Grenzen hannenaus vereinfachen

Bei der Konferenz hunn d’Participanten den Engagement an d’Ënnerstëtzung vum Sommet bei der Kreatioun vum sougenannten European Cross-Border Mechanism (ECBM) gelueft. Dësen Outil, dee vun der EU ausgeschafft gëtt, soll legal an administrativ Demarchen bei grenziwwerschreidende Kooperatioune vereinfachen, wat soumat och Projeten am Kader vun der Landesplanung fërdere géif.

Zu gudder Lescht stoung e spezielle Gebuertsdag un. Zënter 2010 hëlleft de geographeschen Informatiounssystem vun der Groussregioun (SIG-GR) duerch seng Panoplie u Kaarten an Donnéeën bei politeschen Decisiounen. An dësem Kader gouf d’Broschür „10 Joer SIG-GR: D’Groussregioun an 10 Kaarten“ ausgeschafft.

Op dëser Plaz gëtt op de bilinguale Geoportail vun der Groussregioun verwisen, deen iwwer 150 thematesch Kaarten ze bidden huet. D’Participanten hoffen, datt een dësen nëtzlechen Outil an Zukunft mat weidere grenziwwerschreidenden Iddien an Observatiounen, beispillsweis dem dem Interregionalen Observatoire vum Aarbechtsmaart (OIE), verbanne wäert. Wat méi prezis Informatiounen, Kaarten an Analysen zur Verfügung stinn, wat de politeschen Acteuren méi staark ënnert d’Ärem gegraff ka ginn.

Ma, an engems gouf och d’Publikatioun „Chiffre du mois“ nach emol gelueft. Zënter Januar 2020 gëtt si an der Groussregioun verëffentlecht.

Bei der Konferenz dobäi waren nieft dem Claude Turmes als Minister fir Landesplanung och de Willy Borsus (Wallounien), Antonios Antoniadis (Belsch), Nicole Steingaß (Rheinland-Pfalz), Christian Seel (Saarland), Hervé Vanlaer (Grand Est), Franck Leroy (Grand Est), Patrick Weiten (Departement Musel), Valérie Beausert-Leick (Departement Meurthe-et-Moselle) an Stéphane Perrin (Departement Meuse).

Related topics Claude Turmes, Emissiounsfräi, European Cross-Border Mechanism, Geoportail, Groussregioun, Kompetitivitéit, Liewensqualitéit, Sanitär Kris, SIG-GR, Wuelstand
Next post Previous post