Lëtzebuerg als Kandidat beim Rot vun de Mënscherechter

Passend zum internationalen Dag vun de Mënscherechter, dee gëschter stattfonnt huet, konnt de Baussen-an Europaminister Jean Asselborn d’Lëtzebuerger Campagne zu de Wahlen fir d’Mandat 2022-2024 vum Rot vun de Mënscherechter lancéieren. Fir déi éischte Kéier kandidéiert de Groussherzogtum bei de Wahlen am Oktober 2021 fir e Sëtz.

Nodeems Lëtzebuerg fir 2013-2014 eng éischte Kéier e Sëtz am Sécherheetsrot vun de Vereenten Natiounen hat, soll elo op nationalem an internationalem Niveau den Engagement zum Schutz vun de Mënscherechter weider verstäerkt a vertruede ginn. „Mir sinn iwwerzeegt, dass mir en nëtzleche Beitrag bei der Fërderung vun de Mënscherechter am Rot leeschte kënnen“, erkläert de Minister Asselborn.

Dobäi dréien d’Prioritéiten, fir déi Lëtzebuerg sech asetze wëll, ëm folgend 4 Haaptachsen:

• Ënnerstëtzung vum Rechtsstaat, dem biergerleche Raum an de Verdeedeger vun de Mënscherechter am Kampf géint Ongerechtegkeet;
• Nohalteg Entwécklung a Klima-Aktiounen, déi op de Mënscherechter baséieren;
• Geschlechtergläichheet an de Kampf géint Diskriminatioun;
• Schutz a Fërderung vun de Rechter vu Kanner.

Den Dossier zur Kandidatur vu Lëtzebuerg fannt Dir HEI.

E bëssen Erklärung zum Rot

Am Joer 2006 ass de Rot vun de Mënscherechter gegrënnt ginn a stellt dat tëschestaatlecht Haaptorgan vum System vun de Vereenten Natiounen duer. Zil ass et weltwäit Stäerkung a Schutz vun de Mënscherechter ze garantéieren, bei Verstéiss d’Ielebéi auszefueren, Recommandatiounen zum Thema ze ginn, Froen a Situatiounen ze analyséieren.

De Rot trëtt sech 3 Mol am Joer fir gewéinlech Sitzungen zu Genf (Februar-Mäerz, Juni-Juli, September). Sollt een Drëttel vun de Memberstied et verlaangen, kann zousätzlech eng ausseruerdentlech Sitzung aberuff ginn, fir esou Verstéiss an Noutfäll ze behandelen.

Aktuell besteet de Rot aus 47 Memberstaaten,déi bei der Generalversammlung vu Vereenten Natiounen zu New York gewielt ginn. Dobäi kann all Memberstaat vun de Vereenten Natiounen als Beobachter un den Diskussioune vum Rot deelhuelen. E Vott ofginn an aktiv matbestëmmen ass allerdéngs just de Membere virbehalen.

Opmaacherbild: © MAEE