Direkthëllef fir Entreprisen déi Léierplaze schafen

Betriber déi jonke Leit eng Léierplaz ubidde wëllen, esou eng Decisioun déi vum Educatiouns-, dem Aarbechtsministère an de Sozialpartner vum Koordinatiounscomité vun der Tripartite, sollen eng finanziell Direkthëllef erhalen, mussen awer eng Rei Krittäre berécksiichtegen.

Et wieren onsécher Zäiten, esou den Educatiounsminister Claude Meisch an sengem Communiqué vun haut de Moien. De Risk wier grouss, datt vill Betriber drop géife verzichten zur Rentrée déi noutwenneg Léierplazen ze schafen, woubäi d‘Entreprisen déi aktuell Konjunkturlag dofir verantwortlech maachen. Si wieren eigentlech bereet, Léierbouwen a -meedercher opzehuelen, missten hei awer och déi eege Finanzsituatioun berécksiichtegen.

Den Educatiounsministère ënnerstëtzt déi ausbildend Betriber an Entreprisen, fir esou d‘Formatioun vun de jonke Leit ze fërderen an de spéidere Besoine vun enger qualifizéierter Aarbechtskraaft Rechnung ze droen. An esou soll all deene „Wëllegen“ ënnert d‘Äerm gegraff ginn, dat mat der Aféierung vun enger neier „Primm Unique“. Eng Mesure déi sécherlech Sënnvoll ass, firwat dann och sollt begréisst ginn, datt déi genannte Partner eng Rei Krittäre festgeluecht hunn.

Bei dëser Mesure geet et prinzipiell drëms:

• déi ausbildend Organisme beim bäibehale vun den Léierverträg ze ënnerstëtzen;
• déi ausbildend Organismen anzelueden, méi Léierplazen ze schafen;
• déi wéinst der sanitärer Kris opgeléiste Verträg nees opzehuelen.

Ganz wichteg an dësem Kontext: de sougenannten „Apprentissage Adulte“ gëtt am selwechte Mooss an zu de selwechte Konditioune wéi déi initial Ausbildung behandelt.

De Montant vun der Primm an de Berechnungsmodus

Déi vum Educatiounsminister a senge Partner geduechten eemoleg Primm gëtt op der Grondlag vun de folgende Kritäre festgeluecht:

• d‘Zuel vun den zum 15. Juli bestoende Léierverträg, déi nach ëmmer hir Gültegkeet zum Zäitpunkt vun der Demande hunn;
• d‘Zuel vun den neie Léierverträg déi ab dem 16. Juli ofgeschloss goufen;
• d‘Zuel vun de Léierverträg déi erneiert goufen (fir déi wou nom 24. Juni 2020 gekënnegt goufen);
• d‘Moyenne vun de geschafene Léierplaze fir: A) déi lescht dräi Joer fir déi Organismen déi d‘Recht zougesprach kritt hunn auszebilden (dräi Joer virum Datum vun der Demande) – B) der Period verstanen tëscht dem Datum vun der Obtentioun vum Recht auszebilden an dem Datum vun der Demande fir déi ausbildend Organismen déi d‘Recht zougesprach kruten auszebilden, awer manner wéi dräi Joer virum Datum vun der Demande.

Wien ass eligibel?

Déi eemoleg Prime kann allen ausbildenden Organismen zougesprach ginn, déi folgend Kritäre fir d‘Eligibilitéit erfëllen:

• wann d‘Recht hunn auszebilden, dat zum Datum vun der Demande fir déi eemoleg Prime;
• si noweise kënnen, datt ee Léiervertrag ofgeschloss ginn ass an och d‘Proufzäit eriwwer ass;
• si noweise kënnen, datt de Léierbouf/-meedchen bei der Sozialversécherung ugemellt ass;
• an am Fall vun enger Reprise vun engem virechte Léiervertrag, den Léierbouf/-meedchen net Géigestand vun zwou Reprisen zanter dem 24. Juni 2020 ass.

Zu de Modalitéiten:

Fir esou eng Prime ze kréien, muss den ausbildende Betrib / Entreprise eng schrëftlech Demande un de Minister riichten, an dat bis spéitstens de 15. Juli 2021. Dës Demande muss vun enger Rei Ënnerlage begleet ginn

• allen Dokumenter déi de Respekt vun den uewe genannte Konditiounen noweisen;
• eng eedesstattlech Erklärung, datt de Betrib / d‘Entreprise net an enger Faillitte-Prozedur stécht;
• de Relevé vun de Léierbouwe/-meedercher vum ausbildenden Organisme, dee bis dräi Joer virun den Datum vun der Demande ka bestoen, dat mat der Matricule vun den Auszebildenden;
• d‘Bescheinegung iwwert d‘Bankverbindung vum Demandeur.

D‘Demande fir déi eemoleg Prime kann all aner Pièce enthalen, déi den Demandeur fir nëtzlech hält, fir et dem Minister ze erméiglechen, d‘Trëftegkeet vun der Demande ze appreciéieren.

Illustratioun: © ThisIsEngineering RAEng / unsplash