Gratis PCR-Tester fir Persounen, déi sech net impfe kënne loossen

Fir datt Mënschen, déi keng Méiglechkeet hunn sech impfen ze loossen, net komplett am Reen stoe gelooss ginn, huet d‘Regierung decidéiert, datt dës d‘Méiglechkeet kréien, sech gratis op Covid-19 testen ze loossen. De Large Scale Testing gëtt et jo net méi – dofir ass eng Alternativ fonnt ginn.

Den neie Projet bitt Covid19-PCR-Testbongen un. Dës kënnen bis den 31. Dezember 2021 an all akkreditéierten, medezinesche Laboen zu Lëtzebuerg ageléist ginn.

Ab dem 27. September 2021 kënne folgend Persounen op dës Bongen zeréckgräifen:

• Kanner tëscht 6 an 11 Joer, déi zu Lëtzebuerg wunnen. Si erhale vum CTIE automatesch 5 Bonge fir een PCR-Test. Dobäi kënnt nach, datt si och an der Schoul zweemol an der Woch getest ginn – och dës Tester féieren zu engem Certificat, deen op nationalem Niveau benotzt ka ginn.
• Zemools Awunner mat medezinesche Kontradiktioune fir d’Impfung kënnen op dës nei Offer zeréckgräifen. Fir déi 5 Bongen ze kréien, ass et néideg eng Demande bei der Santé (covid19-pcr@ms.etat.lu) ze maachen. Dobäi muss d‘Demande vun engem medezinesche Certificat begleet ginn.
• Och Studenten, déi geimpft sinn an een Test fir d‘Universitéit am Ausland brauchen, kréien dës iwwert d’Association of Luxembourg Student Circles (ACEL).

Opmaacherbild: © Mufid Majnun / unsplash