Et war um Mëttwochmuere fir d‘Éischt, datt sech de neie
Um Freideg huet den Orkan Harvey d’Festland op der Küste
Sech weiderbilden, e liewe laang, dat mécht net nëmme Sënn,
D’Virfreed war dem OPL-Chefdirigent Gustavo Gimeno scho bei der Pressekonferenz, kuerz virum Concert, ofzegesinn. Vum 20. September bis den 1. Oktober sti fir de Lëtzebuerger Orchester Optrëtter a Brasilien, Argentinien an Uruguay un. Mëttlerweil wäerten déi iwwer honnert leidenschaftlech Museker hir Wallis gepaakt hunn a mat Optimismus déi spannend Tour untrieden.
© Martine de Lagardère/moien.lu
Bei der Presentatioun um Owend huet d’Kulturministesch Sam Tanson, trotz Angine, d’Philharmonie an den Orchester fir seng Professionalitéit, seng Diversitéit an de multikulturellen Effekt gelueft. Souwuel op nationalem, wéi och op internationalem Niveau ass d’Philharmonie ee groussen Acteur an der Musekszeen. D’Ministesch weist sech dofir immens houfreg, datt de Programm esou villsäiteg ass, vu Jonk bis Al, Amateur bis Profi, eppes ze bidden huet. Fir d’Rees a Südamerika wënscht si dem Orchester nëmmen dat Bescht!
Eigentlech sollt d’Solistin Janine Jansen d’Südamerika Tour begleeden a mat Feingefill der Gei déi schéinst Téin entlackelen. Aus Krankheetsgrënn misst si all Concerte vun der Rees ofsoen. Kuerzfristeg konnt een am Simone Lamsma, wat eis gëschter vu senger musikalescher Meeschterleeschtung iwwerzeegt huet, an dem Julian Rachlin ee kompetenten Ersatz fannen . An dësem Kader kann een der kranker Solistin just eng gutt Besserung wënschen!
Och de Chefdirigent bedauert de Krankheetsfall, freet sech awer zur gläicher Zäit iwwert déi nei Aventure fir den OPL. Mat groussen Ambitioune wëllen si um anere Kontinent d’Musek jiddwerengem zougänglech maachen. Dobäi wier et net nëmme fir de Publikum een Erliefnis, mee och fir d’Museker selwer bréngt dës Erfarung vill mat sech.
Nach ass net gewosst, wéi de risege Grupp mam Jetlag ëmgoe wäert. Dat enkt Zesummeliewe wärend der Tour wäert allerdéngs fir eng ganz nei Atmosphär, Energie a Freed suergen, déi sech natierlech mat Qualitéit an Enthusiasmus an der Musek erëmspigele wäert.
© Martine de Lagardère/moien.lu
Natierlech muss de logisteschen Aspekt vun esou enger grousser Tour bis an den Detail ausgeschafft sinn. Nodeems feststoung, wou de Lëtzebuerger Orchester invitéiert géif ginn an een eng intelligent Stécker zesumme gestallt huet, koum déi nächst Erausfuerderung op d’Museker duer.
Déi iwwer 100 Museker gemeinsam a Südamerika ze kréien ass eng Saach. Hir Instrumenter sécher op d’Plaz ze kréien, ass déi aner Saach. Den Transfert huet sech ufanks als immens komplizéiert an dobäi och net grad bëlleg erausgestallt. Ëmsou méi glécklech ass den OPL, datt Cargolux als eng vun de gréissten a beléiftste Fluchgesellschafte vum Transport vu Fruecht aller Aart, Initiativ ergraff huet. Als vertrauenswierdegt, kompetent Airline offréiere si nämlech den zouverlässegen Transport vun de Museker hire wäertvollste Stécker.
Um Freideg an e Samschdeg stinn déi éischt international Optrëtter vun der Südamerika-Tour zu São Paulo un. Weider geet et iwwer Buenos Aires a Rosario, op Cordoba, zeréck op Buenos Airesa schlussendlech op Montevideo.
© Martine de Lagardère/moien.lu
Déi nei Aventure kann nëmme mat Succès gekréint sinn. Och wann de groussen OPL-Concert un engem Dënschdeg stattfonnt huet an och nach déi ursprénglech Solistin ausgefall ass, esou war gëschter d’Begeeschterung riseg. All Plaz war besat, museksbegeeschtert Leit an all Alter hu gespaant der Meeschteraarbecht vum Orchester nogelauschtert.
Mam Franz Schubert, Piotr Ilitch Tchaikovsky a Johannes Brahms huet d’Philharmonie fir eng Rees duerch déi klassesch Musek gesuergt, bei der d’Geiistin Simone Lamsma, wat iwwregens an dësem Joer an der Royal Academy of Music opgeholl ginn ass a seng Stradivari „Mlynarski“ vu 1718 a Perfektioun beherrscht, am Virdergrond stoung a mat senger Stëmm den Orchester matgeleet huet.
Opmaacherbild: © Martine de Lagardère/moien.lu