Äre Projet (m)am Naturpark – Verlängerung vum Concours

Eigentlech soll e schonn eriwwer sinn, also de Concours „Äre Projet (m)am Naturpark“, mee du koum d’Coronakris, an esou geet een elo an d’Verlängerung. Déi dräi Lëtzebuerger Naturparken Öewersauer, Our a Mëllerdall hunn, an Zesummenaarbecht mam Ministère fir Energie a Raumentwécklung, elo decidéiert, déi 3. Editioun nach e bësse weiderlafen ze loossen.

Bis ewell si schonn 26. Projeten agereecht ginn. D’Verlängerung ass also net op ee Manktem u Participanten zeréckzeféieren. Den Organisateuren vum Concours ass et wichteg, grad elo an Zäite vun der Pandemie, alle Lëtzebuerger Privatpersounen, Betriber a Veräiner d’Méiglechkeet ze ginn, déi aktuell Situatioun kreativ ze notzen a sech Gedanken ëm d’Zukunft ze maachen.

Gesicht ginn innovativ an nohalteg Projeten an Events. D’Viraussetzung ass, datt de Projet oder d’Evenementer an engem vun den dräi Naturparken ëmgesat musse ginn. Am Ganze gi 6 Gewënner-Projeten ausgewielt, déi vun enger finanzieller Ënnerstëtzung vu bis zu 6.000 € profitéieren dierfen.

Wéi eng Projeten kënnen agereecht ginn?

Äre Projet sollt mat den Ziler vun den Naturparken harmonéieren. Dobäi ass een a vill méi Beräicher aktiv, wéi just Natur an Ëmwelt:

• Tourismus a Fräizäitaktivitéiten (z.B. Een Hotel, deen op Zero Waste ëmklëmmt; Green Events; Organisatioun vu Kleedertauschbörsen;…)
• Wirtschaftlech a sozio-kulturell Entwécklung (z.B. Innovativ Geschäfter mat regionale Produiten; Kannerbicher zu eiser Regioun an Traditiounen;…)
• Erhalt an Opwäertung vum kulturelle Patrimoine (z.B. Handwierklech Traditiounen oprecht erhalen duerch Offeren an der Weiderbildung; Events zur Sensibiliséierung;…)
• Natur an Ëmwelt (z.B. Iddien fir manner Offall ze produzéieren; Fräizäit-Offeren an der fräier Natur;…)

Op der jeeweileger Säit vun den Naturparke sti Formularen zur Participatioun zur Verfügung, déi Dir ausgefëllt mat Ärem Projet bis den 1. Mee 2020 entweder per Mail oder per Post un den Natur- & Geopark Mëllerdall (8, rue de l’auberge L-6315 Beefort) eraschécke sollt. Sollt Dir de Formulaire net fannen, kënnt Dir Iech gären iwwert info@naturpark-mellerdall.lu mellen.