Search

You may also like

Esch Calling! Vol. 1 – Mam Punk an d’Schwaarzt getraff!
Neiegkeeten

Esch Calling! Vol. 1 – Mam Punk an d’Schwaarzt getraff!

D’Kulturfabrik zu Esch huet an dësem Joer een neie Festival

Wéi Ungarn d‘Geld aus Bréissel ënnert d‘Leit bréngt
Neiegkeeten

Wéi Ungarn d‘Geld aus Bréissel ënnert d‘Leit bréngt

Zanter 2010 ass et gewosst, mee et schéngt kaum een

Fabula Rasa: Déi anert Aart a Weis Geschichten ze erzielen
Neiegkeeten

Fabula Rasa: Déi anert Aart a Weis Geschichten ze erzielen

Mam Programm vum Fabula Rasa versetzen d’Rotondes de Spectateur an

Covid-19 an der Educatioun: „Jo Infektioune sinn an der Schoul méiglech“

Covid-19 an der Educatioun: „Jo Infektioune sinn an der Schoul méiglech“

Haut de Moien wollten den Educatiounsminister Claude Meisch an de Romain Nehls, Generaldirekter vum Enseignement Secondaire de Rapport vun der Analys vun der Covid-19 Situatioun an de Schoulen presentéieren. Dobäi huet ee sech op den Zäitraum vum Ufank vun der Rentrée bis zum Ufank vun der Allerhellgevakanz, also vum 15. September bis den 1. November 2020 bezunn.

Trotz enger relativ laanger Pressekonferenz, vollgepaakt mat Zuelen, Statistiken a Schlussfolgerungen, huet d’Lëtzebuerger Bevëlkerung nach ëmmer e grousst Fragezeechen op der Stir. Vun der Ausso „An der Schoul stécht ee sech net un“ si mir mëttlerweil bei „Jo Infektioune sinn an der Schoul méiglech“ (gesot an der Minutt 49:49 am Video) ukomm, a mat „hätten“ a „kënnen“ gëtt ronderëm geschmass.

Nodeems d’Statistiken am Rapport zwar erkläert goufen, trotzdeem net wierklech verständlech sinn, ass et scho bal als Frechheet unzegesinn, datt weder d’Press d’Resultater vun der Analys zougeschéckt krut, nach de Rapport op iergendenger offizieller Säit ze fannen ass (mir loossen eis awer gären eppes Besserem beléieren, falls Dir e fonnt hutt). Nodeems een d’Zuelen also net direkt aus dem Dokument nach emol ukucken an analyséiere kann, bezéie mir eis elo op de Youtube-Video vun der Konferenz.

Wann d’Presenz vum Covid-19 an der Gesamtbevëlkerung klëmmt, dann kommen och d’Schoulen net dolaanscht, am A behalen ze ginn. Schliisslech begéine sech hei, sou de Ministesch Meisch, all Dag iwwer 120.000 Persounen. Generell wier et d’Zil dem Virus wéineg, der Bildung dofir vill Plaz ze loossen.

Wéi eng Upassunge ginn et?

D’Statistiken hätte bewisen, datt déi opgestallte Moossnamen sech als effikass erausgestallt hunn. Just bei den ieweschte Klassen vum Secondaire sinn d’Zuelen u positive Fäll méi héich gewiescht. Eng Ausbreedung vum Virus duerch d’Schoule konnt duerch de Stufemodell (Zeenario 1,2 an 3) verhënnert ginn. Ma, aus dësem Grond wier et och net noutwenneg e generaliséierten AB-Modell anzeféieren.

SchoulScreenshot – Video

„Mir hunn et fäerdeg bruecht d’Verbreedung vum Virus mat där dote Method (Zeenario 1-3) kënnen ze stoppen. D’Verbreedung vum Virus ass an den allermeeschte Fäll duerch den Zeenario 1 net weidergaangen, op schonns mir keng Quarantaine haten, op schonns mir konnten d’Beschoulung vun de Schülerinnen a Schüler weider och sécher stellen“; ënnersträicht de Minister. Virun der Allehellgevakanz waren 192 Klassen am Zeenario 2 an 3, wouduerch d’Schüler hu missen a Quarantaine goen an de reguläre Cours net konnt stattfannen. Hätt een op den Zeenario 1 verzicht, dann hätt sech déi Zuel verdräifacht.

Esou kënnt et zu dëse klengen Upassungen:

  • Fir de Fondamental (ab dem Cycle 2) an d’Maisons Relais: Keng Maskeflicht, wann de Schüler sëtzt;
  • Fir de Lycée: Kënnen generell Maskeflicht aféieren;
  • Schoulkantinnen am Fondamental a Secondaire: Just 4 Schüler pro Dësch, wéi och an der Restauratioun;
  • Selwecht Moossname fir de Schoulsport, wéi am Veräinssport;
  • Méi Kapassitéite beim Schoultransport;
  • Renconteren/Reuniounen tëscht méi wéi 4 Professionellen aus der Educatioun iwwert Videokonferenzen;
  • Ordonnance fir e Covid-19-Test an d’Quarantaine ginn iwwert d’Schoul verdeelt. Se ginn nach ëmmer vun der Gesondheetsdirektioun erstallt an iwwert d’Schoul un d’Eltere verdeelt. Schüler, déi an den Zeenario 1 falen, mussen sech de 6ten Dag teste loossen, awer och just mam Accord vun den Elteren. Mat der Ordonnance kann een och an e Labo goen.

Eréischt wann d’Regierung seng Moossname méi streng fir d’Gesamtgesellschaftlech ausbaue géif, géif och de Bildungssecteur matzéien.

SchoulDe Romain Nehls, Generaldirekter vum Enseignement Secondaire / Screenshot-Video

Vun 3 op 4 Zeenarien

Zu den 3 Zeenarien, wéi eng Klass am Fall vun engem oder méi positive Fäll kategoriséiert gëtt an handele muss, ass vill Kritik opkomm, déi, wéi de Minister sot, och berechtegt ass. Fir méi Prezisioun bidden ze kënnen, wäerten et an Zukunft 4 Zeenarien ginn:

  • Zeenario 1: Et gëtt een isoléierte Fall an enger Klass. Déi komplett Klass gëtt „à l’écart“ gesat, awer keng Quarantaine gefuerdert. Et geet een dovunner aus, datt d’Infektioun net an der Schoul stattfonnt huet;
  • Zeenario 2: Zwee positiv Fäll sinn an enger Klass gewiescht. Et weess een awer net wou d’Infektioun hierkënnt;
  • Zeenario 3: Tëscht zwou a fënnef Infektiounen gouf et an enger Klass. Duerch d’Quarantaine wëll een d’Kontroll iwwert Verbreedung vum Virus erëmgewannen;
  • Zeenario 4: Méi wéi fënnef Fäll goufen et an enger Klass, respektiv hänken d’Fäll klasseniwwergräifend zesummen.

De Claude Meisch an de Romain Nehs preziséieren nach emol, datt d’Schoul net den Dreiwer vum Virus ass, mee déi meescht Infektiounen ausserhalb vun der Schoul zustane kommen. De Fondamental ass, no den Zuelen déi vun der sanitärer Inspektioun kommen, bei Wäitem manner vu positive Fäll betraff wéi de Secondaire. Dat erkläert de Generaldirekter vun der Educatioun domat, datt een an der Grondschoul nach net esou vill sozial Kontakter huet.

SchoulScreenshot – Video

Kuckt een de Secondaire, da sollen et keng grouss Ënnerscheeder bei den Zuelen tëscht dem Enseignement Classique, dem General an der Formation Professionelle ginn.

Related topics Allerhellgevakanz, Claude Meisch, Covid-19, Educatioun, Maskeflicht, Moossnamen, Quarantaine, Rapport, Rentrée 20/21, Romain Nehls, Zeenarien
Next post Previous post