Search

You may also like

Frankräich: Zwee Polizisten absichtlech mam Auto ugestouss
International Kultur

Frankräich: Zwee Polizisten absichtlech mam Auto ugestouss

E 29 Joer jonke Fransous huet zu Colombes (Hauts-de-Seine) huet

D‘Reform vun de Rettungsdéngschter, erkläert
International Kultur

D‘Reform vun de Rettungsdéngschter, erkläert

D‘Visite zesumme mam Inneminister Dan Kersch, vun den ënnerschiddleche Rettung-Corps’en

Superjhemp Retörns: A Kanada am Kino, bei eis op DVD!
International Kultur

Superjhemp Retörns: A Kanada am Kino, bei eis op DVD!

Samsa Film ass houfreg matzedeelen, datt de Film „Superjhemp Retörns“

Sexuell Aggressioune stinn am Marokko fir Fraen op der Dagesuerdnung. Elo schreift eng Fra doriwwer!

Sexuell Aggressioune stinn am Marokko fir Fraen op der Dagesuerdnung. Elo schreift eng Fra doriwwer!

Iwwerzeegt dovunner, datt „sexuell Rechter en Deel vun de Mënscherechter“ sinn, weist déi franko-marokkanesch Romancière Leila Slimani – Prix Goncourt 2016 – an engem Buch androcksvoll, wéi wäit déi marokkanesch Fraen haut nach vun enger Unerkennung op sexuell Fräiheet ewech sinn.

Sexe et Mensonges – La vie sexuelle au Maroc (1) kënnt e Mëttwoch an d‘Butteker. Dat, wou nach virun dräi Wochen e Video erauskoum, dee weist, wéi an engem Bus zu Casablanca eng Fra ver gewaltegt gëtt. D‘Buch ass um Dënschdeg och zeréckbehale gi fir de „Prix Renaudot“ an der Kategorie „Essais“.

Sachlech Prezis

Beim Liese vun den Aussoe vu Marokkanerinne, déi Leila Slimani opgeschriwwen huet, muss ee feststellen, datt de Fall „Casablanca“ kee separate Phänomen ass. D‘Leila, dat iert et Romancière ginn ass, als Journalistin fir „Jeune Afrique“ geschafft huet, bleift bei der Iwwerliwwerung vun den Temoignagë sachlech prezis.

Den Zoufall wollt et, datt meng ‚éischte Kéier‘ eng Vergewaltegung war.

Zhor, Fra déi en Temoignage am Buch ofgëtt

„Den Zoufall wollt et, datt meng ‚éischte Kéier‘ eng Vergewaltegung war. Et waren dräi Männer, ech hat 15 Joer“, vertraut d‘Zhor, eng jonk Fra vun 28 Joer vu Rabat, der Romancière un. Zhor kann een och am graphesche Roman Paroles d‘Honneur (2) erëmfannen. Eng Publikatioun, déi parallel zum Leila sengem Buch erschéngt a mat der Zeechnerin Laetitia Coryn ausgeschafft ginn ass.

D‘Nour, eng 30-järeg Fra vun Agadir, erënnert sech, datt e Koseng hat „ugepaakt“ hat, wéi et grad emol fënnef Joer al war. „F.“, eng Prostituéiert, erzielt vu senge Qualen; d‘Malika, eng onbestueten Doktesch vu 40 Joer erzielt vu senger Ofdreiwung (wat a Marokko ofgesinn vu wéinegen Ausnamen illegal ass) an d‘Mouna erkläert, wéi schwéier et ass a Marokko lesbesch ze sinn.

Dat an engem Land, dat vu sech an den offizielle Riede behaapt, de Priedeger vun engem toleranten Islam ze sinn an wou d‘Fraen net gezwonge sinn, de Voile ze droen. D‘Marokkanerinne sinn hei d‘Affer vu stännege Beleidegungen, offällege Bemierkungen an sexuellen Aggressiounen am ëffentleche Raum. Fakten, déi iwwerzeegend am Essai vun der Schrëftstellerin duergestallt ginn.

Berechtegt Virwërf

Homosexueller a Ehebriecherinne „sëtze ganz reell Prisongsstrofen of“, iergert sech d‘Leila Slimani. „D‘Frae mussen d‘Méiglechkeet op e Matsproocherecht an enger Kultur ze kréien, déi d‘Geisel vun de Reliéisen an dem Patriarchat ass“, fuerdert déi feministesch Autorin, där hir Bicher am Marokko fräi ze kréie sinn.

„Wann e sech un d‘Gesetz, esou wéi et besteet, an un d‘Moral, esou wéi se iwwerliwwert gëtt, hält, muss en dovunner ausgoen, datt all onbestuete Fra am Marokko eng Jongfra ass. Datt all déi jonk Leit a jonk Fraen, déi d‘Hallschent vun der Populatioun ausmaachen, ni eng sexuell Relatioun haten“, ënnersträicht d‘Autorin vun Chanson douce (3) an Dans le jardin de l‘ogre (4)

Mam batteren Ënnertoun vun der Ironie seet d‘Leila Weider: „Déi onbestuet, homosexuell a prostituéiert Mënsche gëtt et a Marokko net“.

„Institutionaliséiert Kultur vun der Ligen“

D‘Leila Slimani veruerteelt d‘Hypokrisie an „déi institutionaliséiert Kultur vun der Ligen“ vun der marokkanescher Gesellschaft, wou d‘Éier iwwert allem steet. „Déi wou d‘Muecht hunn, vun der Politik bis zu den Elteren, halen all déi selwecht Ried: Maacht wat der Wëllt mee maacht et esou dat keen et gesäit“.

Anersäits awer, wëll d‘Leila net dem Islam d‘Haaptschold un de Schwieregkeete ginn, déi Marokkanerinnen drun hënneren, hir Sexualitéit ganz auszeliewen. „Sécher“, esou d‘Romancière „moslemesch Gesellschafte sinn ronderëm e sëllechen Tabu‘en opgebaut, wéi Unzuucht, Homosexualitéit, ausserehelech Schwangerschaft, Ofdreiwung an Prostitutioun“.

Stänneg am Kräizfeier vu radikalen Islamisten, déi d‘Leila beschëllegen sech dem „Weste verkaf“ ze hunn, erënnert d‘Autorin och un déi eendeiteg burlesk Aussoe vun islamesche Priedege. Do gëtt et der, déi behaapten, datt de Islam de sexuellen Akt un engem Kadaver erlaabt, ënner der Bedingung datt et engem seng  „Fra“ ass. Oder déi Behaaptung, datt den Islam der Fra verbitt Vëlo ze fueren, well dat si sexuell erreegt.

Mee, esou Leila Slimani, et muss een awer festhalen, datt d‘Misogynie universell gedeelt gëtt. Esou dierf drop higewise ginn, datt den Artikel am marokkanesche Code Penal mat deem homosexuell Relatioune bestrooft ginn, „déi genau Kopie“ vum ale franséische Code Penal ass, deen eréischt 1982 opgehuewe gouf.

„Ech verwerfe resolut d‘Iddi, datt d‘Identitéit, d‘Relioun oder iergend eng historesch ‚Ierfschaft‘ den Individuen hir universell an onabdingbar Rechter kann a Fro stellen“, esou D‘Schrëftstellerin.

Foto: (© Joel Saget/AFP)

mam Alain Jean-Robert/AFP

(1) Sexe et Mensonges – La vie sexuelle au Maroc / Aut. Leila Slimani / Ed. Les Arènes / ISBN 2352045681

(2) Paroles d‘Honneur / Aut. Leila Slimani / Dess. Laetitia Coryn/ Ed. Les Arènes / ISBN 9782352046547 / Bande Dessinée

(3) Chanson douce / Aut. Leila Slimani / Ed. Gallimard / ISBN 978-2-07-019667-8

(4) Dans le jardin de l‘ogre / Aut. Laila Slimani / Ed. Gallimard / ISBN 2070468186

Related topics Autorin, Buch, Leila Slimani, Marokko, Sexualitéit
Next post Previous post