Stauséi Do’s an Don’ts – Vun der Offallentsuergung bis zum wëlle campen

De Lëtzebuerger Stauséi lackelt am Summer zuelräich Visiteuren un, déi vun der fantastescher Landschaft, de villsäitege Wanderweeër an der attraktiver Wiss mat Schwammméiglechkeet profitéiere wëllen. D’Freed vum Schwamme soll jiddwerengem gegënnt sinn, deen Respekt géigeniwwer der Ëmwelt an der Natur weist.

Mat ganzer 60 Millioune Kubikmeter Waasser aus dem Drénkwaasserbasseng kann ¾ vun der Lëtzebuerger Bevëlkerung versuergen. Wien Erhuelung an/oder Spaass an der Natur sicht, dee soll dës och respektéieren. De Stauséi propper an esou och d’Waasserqualitéit héich ze halen, ass déi iewescht Prioritéit. Ma, och de Liewensraum vun zuelräichen Aarte soll erhale bleiwen. De Mënsch léift schliisslech net eleng op dësem Planéit.

Léif Visiteuren, haalt Iech u folgend Reegelen:

• Entsuergt Ären Dreck an de Poubellen an Dreckscontaineren. Denkt dobäi drun richteg ze sortéieren. Sollt et duerch iwwerfëllt Containeren net méiglech sinn, den Offall ze entsuergen, da musst Dir en mat Heem huelen. D’Ewech-geheie vun Dreck an der Natur ass, sou wéi am ganze Land, och um Stauséi verbueden. Ongëeegent Substanzen, sou wéi léislech Schuedstoffer oder och Plastik kënnen d’Waasser belaaschten.
• Grille ass just op den dofir virgesinne Plazen erlaabt. Ronderëm de Stauséi ginn et aktuell just zu Ënsber um „Fussefeld“ 2 gebaut Grillplazen, déi ëffentlech genotzt dierfe ginn. An den nächste Joren sollen awer weider Grillplazen bäikommen. Wien Honger huet kann vu mobillen Iessbuden profitéieren. Duerch eventuell Verknaschtungen an/oder Bränn ass wëllt Grillen a Feier-maachen op der Wiss net erlaabt. Besonnesch d’Ewech-geheien vu waarme Kuelen an Eeweegriller féiert reegelméisseg zu Dreckscontainer, déi a Flamen opginn.
• Hënn sinn op de Wise ronderëm den Uewerstauséi verbueden. Duerch Onrouen ënnert de Gäscht huet d’Gemeng decidéiert, datt d’Véierbeener Doheem bleiwe mussen.
• Wëllt Campen an Zelten ass a ganz Lëtzebuerg verbueden a genee dat gëllt och um Uewerstauséi. Partien um Owend féieren net nëmmen bei den Awunner an der Géigend zu Onzefriddenheet, mee stéieren och nuetsaktiv Déieren.

Mat neien Offeren huet den Naturpark Öewersauer an de leschte Jore probéiert, e responsabelt a respektvollt Verhalen an der Natur bei de Visiteuren ervirzebréngen. Dobäi kommen zwee Food Trucks, déi zu Ënsber a Lëlz lecker Snacks verkafen. Et schafft ee weiderhin drun d’Offer ze verbesseren, an esou och Produiten aus regionalem Ubau an offallfräi Léisungen anzeféieren.

Esou waart beispillsweis elo der Frau Cool hir Iessbud „Opim’s“ mat leckeren Hotdogs, selwer hiergestalltem Gedrénks a Glace, oder och dem Här Reinertz säi „Flux“ mat super Burgeren, Gedrénks a Glace op Äre Besuch. Si sinn Weekends bei schéinem Wieder op der Plaz. Op ass vu Mëttes bis géint 20:00 Auer.

Ma, och d’Sensibiliséierung steet am Fokus. Nieft Clowns, déi op de Wisen op déi verschidde Problemer hiweisen, gëtt an dësem Joer en neit Konzept virgestallt: Ënnert dem schwedeschen Trend „Plogging“ versteet een nämlech ze joggen, an dobäi Dreck opzerafen. Den nächste Rendezvous ass um 31. Juli zu Ënsber, um 28. August zu Léifreg an um 25. September zu Lëlz. Nom Opwierme gëtt zesummen eng Streck vun ronn 5 km gelaf. Start ass um 18:00 Auer. Umelle muss ee sech am viraus ënnert info@naturpark-sure.lu oder ënnert der Telefonsnummer 89 93 31-1.

Opmaacherbild © Shari Pleimelding/moien.lu