What the Fakt – Haut ass den internationale Kannerdag

Eis Butzen hunn direkt zwee Mol d’Joer een internationale Feierdag: ee Mol den 1. Juni an haut. Et sinn zwee Datumer mat engem Ziel. D’Wuelergoe vun de Kanner steet am Mëttelpunkt an et soll op Kanneraarmut, feelend Schoulbildung, Kanneraarbecht a Kannerrechter opmierksam gemaach ginn.

Nom internationale Männerdag gëschter an dem Weltfraendag um 8. Mäerz ass et haut un de Klengste fir d’Wuert ze kréien. Heibäi geet et net ëm Spillen a Spaass, Sprangschlässer, Seefeblosen oder mat senge Kollegen eng ze stiichten. Vill méi geet et haut dorëm, ee Bewosstsinn ze schafe fir d’Rechter, de Schutz an d’Meenung vun de Kanner.

E bësse Geschicht

Den internationale Kannerdag geet zeréck op d’Genfer Weltkonferenz 1924 fir d’Wuelergoe vun eise Butzen. Hei gouf ënner anerem beschloss, datt Kanner zu all Zäitpunkt an der Lag musse sinn, sech souwuel a materieller, wéi och a geeschteger Hisiicht op natierlech Aart a Weis ze entwéckelen. Donieft sollen si am Noutzoustand als éischt Hëllef kréien, sou wéi zou all Zäit ënnerstëtzt ginn. Gutt 30 Joer méi spéit ass dunn eng offiziell Deklaratioun vun de Kannerrechter opgestallt ginn. Um 20. November 1989 koum dunn schlussendlech d’UN-Kannerrechtskonventioun vun de Vereenten Natiounen.

De grousse weltwäite Problem

• Kanneraarbecht: Si sinn esou jonk a mussen awer ënnert deelweis extrem geféierleche Situatioune scho schaffe goen, fir hir Famill finanziell ze ënnerstëtzen. Déi schwéier Aarbechten a Mësshandlunge féieren zu kierperlechen a séilesche Schied.
• Ënnerernierung: Weltwäit leit een Drëttel vun de Kanner ënner fënnef Joer u chronescher Mangelernierung. Virun allem an den zwee éischte Liewensjoren kann dat liewensbedreeleche Konsequenzen hunn an déi physesch, motoresch a geeschteg Entwécklung negativ beaflossen.
• Bildung: Ville Kanner kennen aus finanzielle Grënn net an d’Schoul, se si wéinst dem Krich zougemaach ginn oder de Wee ass extrem wäit a geféierlech.
• Kannerhandel: Et ass ee weltwäite Problem, och an eisen Nopeschlänner! Ëmmer erëm gi, virun allem jonk Meedercher, fir Prostitutioun a Pornographie entfouert. Virun allem Flüchtlingskanner sinn heivu betraff. Si gi sexuell mëssbraucht, zwangsbestuet, zum Drogenhandel oder Klaue gezwongen oder als Kannerzaldoten ausgebilt.
• Fräiheet: Vill Kanner hu kee Recht op Meenungsfräiheet, wëll se schaffe goe mussen, net an d’Schoul kënnen oder hir Elteren si net ënnerstëtze kënnen.
• Aarmut: Dat ass de weltwäit gréisste Problem. No enger Etüd vun UNICEF lieft virun allem an Entwécklungslänner all fënneft Kand vun net emol 1,50 € den Dag. Aus dësem Grond feelen hinne grondleeënd Saache, wéi Drénkwaasser, Iessen, medezinesch Hëllef an/oder een Daach iwwert dem Kapp.

Et muss ee bedenken, datt ee Groussdeel vun dëse Problemer net nëmme wäit ewech an den Entwécklungslänner virkommen, mee sech och ëmmer méi an eiser Géigend heefen. De Sputt tëschent Arem a Räich war nach ni esou grouss an et ass ee schrecklecht Trauerspill, datt grad déi Klengst dorënner leide mussen, woubäi si eiser aller Zukunft sinn.

Kanner – ee Wonner fir sech

Et ass ee bedréckend Thema an eng eescht ze huelend Problematik. Trotzdeem soll dësen Artikel net grad esou belaaschtend ophalen. Dofir sinn hei e puer interessant Fakten iwwert eis allerléifst Butzen:

1. Am Kierper vun engem nei gebuerene Bebe huet just eng Taass Blutt.
2. Bis zum Alter vu 7 Méint kënne Kanner gläichzäiteg ootmen a schlécken.
3. Géife Kanner ëmmer sou schnell wuesse wéi an hirem éischte Liewensjoer wiren se um 18. Gebuertsdag ongeféier 5 Meter grouss.
4. An engem vun 2000 Fäll kënnt et fir, datt ee Bebe scho mat Zänn op d’Welt.
5. D’Gehéier vu klenge Kanner ass enorm sensibel, wouduerch si méi héich an déif Frequenzen ophuele kënnen, wéi een erwuessenen.
6. Bei Kanner tëschent 1 an 2 Joer entstinn all Sekonn 2 Milliounen nei Synapsen am Gehir.

Eng kleng Informatioun niewebäi wann Dir Eltere gi sidd. Um 24. November organiséiert den ACL säin traditionelle Kannersëtzbazar, wou dir gebraucht a vum Club gepréiften a genormte Kannersëtzer fir ee gudde Präis kafe kënnt. Esou garantéiert dir d’Sécherheet vun ärem neie klenge Familljemember.

Quellen:

• www.humanium.org
• www.kinderrechtskonvention.info
• www.grosseltern.de
• www.activebeat.com
• www.netmoms.de