Haut ass den internationale Kannerdag

Tatsächlech ass et esou, datt et bei dësem Dag keen eenheetlechen Datum gëtt, am Däitschland an Éisträich ass et zum Beispill den 20. September an, d’Tierkei feiert den 23. Abrëll, mee a anere Länner ass et den 1. Juni.

D’Vereenten Natiounen besoen, datt den 20. November de Weltkannerdag ass, vill Staaten hunn sech dësem Datum ugeschloss.

A wann een et esou hëlt, misst eigentlech all Dag Weltkannerdag sinn, si zielen jo net nëmmen de besonneschen Dag …

Ewéi och ëmmer, de Message ass eigentlech ëmmer de selwechten – et geet ëm d’Kannerrechter an hier Bedürfnisser, déi ginn dacks vernoléissegt, an dësem Kader muss d’Ëffentlechkeet nach immens opgekläert a sensibiliséiert ginn. Et ass nämlech wichteg fir d’Interesse vun de Kanner anzetrieden, si kënnen et nach net selwer. Oder richteg.

Dobäi geet et ënnert anerem ëm d’Recht op eng uerdentlech Bildung, e stabilt a séchert Doheem an eng gesond Ernierung.

A grad dofir ass eng richteg Opklärung iwwert Ernierung a Sport wichteg – e gesond Kand ass bekanntlech e glécklecht Kand.

D’Kanner sinn d’Generatioun no eis, ëm sou méi wichteg, datt mir Erwuessener gutt op se Uecht ginn. Mat dem gréisstméiglechste Respekt.

Si hunn d’Recht op Léift, op e Liewen ouni Gewalt. Si däerfe matbestëmmen an hir Meenung soen, och wann dat net jiddwerengem gefält. An dorunner gëtt sech a villen Deeler vun der Welt net gehalen.

Tatsächlech ass et nämlech esou, datt leider vill Kanner aus Entwécklungslänner Aarbechte musse verriichten, déi net nëmmen duerch UN-Konventioune verbuede sinn, mee och immens geféierlech a schlecht fir d’Gesondheet sinn.

Dat muss sech änneren!

A genee dofir ass dësen, an all aneren Dag wichteg – et muss drop opmierksam gemaach ginn, datt et de Kanner op der ganzer Welt besser soll/muss goen.

Zemools Eltere solle méi Zäit mat de Kanner verbréngen – an enger Famill léiert e fréi, wéi wichteg et ass Verantwortung ze iwwerhuelen. Récksiicht op en aneren ze huelen. Streiden a sech verdroen. Bridderlech deelen.

Dat alles stäerkt de Charakter – a mécht aus Kanner Leit, déi sech fir hier Iwwerzeegungen asetzen an d’Äerd zu enger besserer Plaz wëlle maachen. An dat ass jo ganz an eisem Sënn, oder?

Dernières nouvelles