Search

You may also like

Zweet Erdrénken – Wann de klenge Kierper ëm d’Iwwerliewen kämpft
International Kultur Neiegkeeten Stories

Zweet Erdrénken – Wann de klenge Kierper ëm d’Iwwerliewen kämpft

De Summer ass do – wat gëtt et Besseres ewéi

Israel huet ugefaangen déi Jonk ze impfen
International Kultur Neiegkeeten Stories

Israel huet ugefaangen déi Jonk ze impfen

Israelitte streiden sech gären, oft och iwwert onwichteg Themen. Bei

Haut ass den Europäeschen Dag vun de Sproochen!
International Kultur Neiegkeeten Stories

Haut ass den Europäeschen Dag vun de Sproochen!

Um haitege Dag fënnt den Europäeschen Dag vun de Sproochen

What the Fakt – Steif(f) an och nach ee Knapp am Ouer!

What the Fakt – Steif(f) an och nach ee Knapp am Ouer!

Et ass d’Geschicht vun enger aussergewéinlecher Fra an hirer eenzegaarteger Entreprise. „Wien u sech selwer gleeft, ass fräi“, esou soen et op alle Fall d’Petzie vu Steiff. Mat engem klengen Elefantepetzi huet d’Margarete Steiff den éischte Schrëtt vun enger immenser Erfollegsgeschicht gemaach, déi och haut nach Kleng a Grouss faszinéiert. Ass bei Iech och ee Steiff Doheem?

Haut virun 172 Joer ass d’Margarete Steiff zu Giengen un der Brenz op d’Welt komm. No héijem Féiwer konnt d’Kand d’Been net méi beweegen, sou wéi de rietsen Aarm just nach ënnert schlëmmer Peng belaaschten. Een Dokter konstatéiert schliisslech, datt d’Meedchen u Kannerlämung erkrankt ass.

Wat anerer als schwéiert Schicksal ugesinn, huet dem jonke Margarete d’Liewensfreed net ewech huele kënnen. Mat Hëllef an Ënnerstëtzung, sief et vun den dräi Geschwëster an Nopeschkanner, déi d’Meedche bis an de Klassesall bruecht hunn, oder och duerch den eegene Wëllen seng Plaz op der Welt ze fannen, konnt hatt mat Energie a Freed ervirstiechen.

D’Péng konnt d’Margarete emol net vun der Formatioun als Néiesch ofhalen. Mat 17 Joer konnt hatt stolz an der Dammeschneiderei vun de méi ale Schwëstere Marie a Pauline schaffen. Doduerch, datt seng Geschwëster puer Joer drop d’Heemescht verlooss hunn, konnt déi talentéiert Fra de Grondsteen zur Selbststännegkeet leeën.

Esou huet hatt d’Elterenhaus ëmbaue gelooss, datt déi mëttlerweil erwuesse Fra souguer eng eege kleng Schneiderei opmaache konnt. Mat den éischte Sue konnt sech dunn endlech eng richteg Bitzmaschinn kaaft ginn. Mat all Fuedem ass si esou dem Erfolleg méi no komm.

Steiff

Hei iwwregens den Elefäntle © Flominator

De klenge Stoffelefant

Duerch ee gudde Rot huet d’Madamm Steiff schliisslech ee Filzkonfektiounsgeschäft opgemaach. Duerch den immense Succès konnt si schonn no kuerzer Zäit begaabt Mataarbechter astellen. Hire selwer kreéierten Elefäntle, deen eigentlech als Nolekësse geduecht war, huet den Ufank vun eppes ganz Groussem duergestallt.

Dat kleng Stoffdéier war nämlech virun allem bei de Kanner esou beléift, datt schonn e puer Joer méi spéit d’Steiff GmbH entstanen ass, woubäi de klenge Petzi mam Rüssel den absolute Liebling war. Iwwer 5000 Elefäntle si bis dohinner ewell u begeeschtert Kanner gaangen.

Esou eng Geleeënheet léisst ee sech als intelligent Geschäftsfra net duerch d’Lappe goen! Esou entsti mat vill Passioun ënnert dem Motto „Fir Kanner ass just dat Bescht gutt genuch“ eng ganz Kollektioun u Stoffpetzien. Mat Mais, Huesen, Giraffen a villem méi sinn d’Aen zum Fonkele bruecht ginn.

Steiff

De Kampf vum Margarete Steiff ëm Unerkennung a Succès ass iwwregens och verfilmt ginn. D’Wierk dréit de selwechten Numm, wéi d’Fra selwer

Vum Elefant zum Bier

Wousst Dir, datt den éischte Plüschbier vun der Firma Steiff kënnt? De Lieblingsneveu Richard Steiff huet der talentéierter Fra ëmmer nees op een Neits Entwërf fir nei Kreatioune geliwwert. An schliisslech war e gebuer: 1902 koum den weltwäit éischten Teddy „Bär 55 PB“ mat beweeglechen Äerm a Been eraus. Trotz Skepsis säitens dem Margarete huet de Richard säi Bier op enger Foire presentéiert…a voll an dat Schwaarzt getraff!

Een Amerikaner huet direkt 3000 Exemplaire vun de kuschelege Biere bestallt, wouduerch de Petzi och op der anerer Säit vun der Welt populär ginn ass. Säin Numm „Teddy“ krut hien iwwregens duerch den amerikanesche President Theodore Roosevelt.

Fir och weiderhi mat Exklusivitéit a Qualitéit un der Spëtzt ze bleiwe kruten d’Petzien hiren Ouerrank – ah nee de Knapp an d’Ouer. Am Joer 1907 huet Steiff mat senge 400 Mataarbechter, 1800 Heemaarbechter, 973.999 Teddyen an 1.700.000 Spillsaachenartikelen de Ruff als Weltfirma gewonnen.

Mat 61 Joer stierft d’Margarete un enger Longenentzündung. Fir d’Famill ass et keng einfach Zäit, an awer huet den Neveu et gepackt, d’Entreprise um Lafen ze halen, sou datt eis och haut nach dat plüschegt Original erhale bliwwen ass.

Steiff

De Richard Steiff mam “Bär 55 PB”

Scho gewosst?

  • Uhlala: Och de verstuerwenen Designer Karl Lagerfeld huet fir Steiff Petzien designt
  • Den 125. Gebuertsdag: op enger Fläch vun 2400 Quadratmeter ass 2005 zu Giengen de Musée „D’Welt vu Steiff“ opgaangen
  • Ee klengt Bierekand: Fir de 50. Gebuertsdag vum Teddybier am Joer 1953 ass den „Jackie“ presentéiert ginn – ee léift Bierekand, dat souguer ee Bauchnuebel huet
  • D’Jubiläums-Editioun: Am Joer 1907 ass de Milliounsten Teddybier ugefäerdegt ginn, 100 Joer méi spéit koum dofir d’Editioun „A Million Hugs“ eraus
  • Ausgezeechent: Bei der Weltausstellung zu Bréissel am Joer 1910 huet Steiff de Grand Prix gewonnen, 2018 konnten si den Disney Heritage Award entgéint huelen
  • De Kéisécker: Nom zweete Weltkrich konnt d’Firma duerch de Mecki, pickegt Maskottchen am Fernseh an der Zeitung, nees schnell wuessen
  • Verschidde Knäpp: De Knapp am Ouer gëllt bei Steif als „Gütesiegel“, woubäi Giel een Artikel aus dem lafende Programm kennzeechent, Wäiss mat rouder Schrëft ass eng limitéiert Editioun an schwaarz Schrëft steet fir eng limitéiert Replik
  • Alles Steiff: Duerch den Zesummeschloss mat Schulte ass Steiff weltwäit den eenzege Petzi-Hiersteller, dee seng eege Stofffabrik huet
Steiff

Wat dëse Vuitton-Bier wuel kascht?

Wien haut nach ee Steiff-Petzi doheem huet, dee ka sech glécklech schätzen an huet souguer vläicht ee wäertvolle Schatz bei sech. Am Joer 2010 ass beispillsweis een Teddybier mat integréierter Wiermfläsch vun 1910 fir ganzer 28.000 € verkaaft ginn. Ee vun de staark limitéierte Bieren aus der Jubiläumseditioun mat gëllener Nues an Aen ass souguer fir 79.000 € iwwert den Dësch gaangen. Op éischter Plaz steet awer nach ëmmer de Louis Vuitton Teddy, deen am Joer 2000 fir 1.978.000 € verkaaft ginn ass – fir de gudden Zweck versteet sech.

Related topics Kannerlämung, Margarete Steiff, Petzi, Teddybier, Theodor Roosevelt, What the Fakt
Next post Previous post